فرانس نے پاکستان کی تعمیر نو کے لیے بین الاقوامی کانفرنس کی میزبانی کرنے کی پیشکش کر دی

 فرانس کا پاکستان کی تعمیر نو کے لیے بین الاقوامی کانفرنس کی میزبانی کرنے کی پیشکش

اسلام آباد: وزیر اعظم شہباز شریف نے اقوام متحدہ کی جنرل اسمبلی کے 77 اجلاس 2022 کے موقع پر فرانس کے صدر ایمانوئل میکرون سے ملاقات کی جس کے دوران پاکستان اور فرانس نے سیلاب کی وجہ سے پیدا ہونے والے چیلنج سے نمٹنے کی کوششوں کی حمایت کرنے کے طریقوں اور ذرائع کی نشاندہی کرنے پر اتفاق کیا۔

مزید براں پیرس نے سال کے اختتام سے پہلے ایک بین الاقوامی کانفرنس کی میزبانی کرنے کی پیشکش کی تاکہ اسلام آباد کو موسمیاتی تبدیلیوں سے پیدا ہونے والی تباہی کے بعد تعمیر نو میں مدد ملے۔

 دونوں راہنمائوں کی ملاقات کے بعد جاری ہونے والے مشترکہ بیان کے مطابق وزیراعظم نے صدر میکرون کو پاکستان بھر میں موسمیاتی تبدیلیوں سے پیدا ہونے والے سیلاب سے ہونے والی تباہی سے آگاہ کیا، اس سلسلے میں فرانس کی جانب سے دی جانیوالی امداد، خیموں، واٹر پمپوں اور ڈاکٹروں اور نرسوں کی ٹیم کی بروقت امداد بھیجنے پر فرانس کا شکریہ ادا کیا اور امید ظاہر کی کہ ملک بحالی اور تعمیر نو کے مرحلے میں اپنا کردار ادا کرتا رہے گا۔

وزیراعظم نے جی ایس پی پلس اسکیم کی حمایت پر فرانس کا شکریہ ادا کرتے ہوئے کہا کہ اس سے یورپی یونین کے ساتھ ساتھ فرانس کے ساتھ تجارتی اور اقتصادی تعلقات کو فروغ دینے میں مدد ملی ہے۔::