سیلاب کے بعد پاکستان میں دوسری آفت کا خطرہ منڈلا رہا ہے: سربراہ عالمی ادارہ صحت

 سیلاب کے بعد پاکستان میں دوسری آفت کا خطرہ منڈلا رہا ہے: سربراہ عالمی ادارہ صحت

جنیوا:(دنیا نیوز)  اس  بات کا اظہارعالمی ادارہ صحت (ڈبلیو ایچ او) کے سربراہ ڈاکٹر ٹیڈروس نے 10 ملین ڈالر امداد کی اپیل جاری کرنے کا عندیہ دیتے ہوئے کیا اور  اور مزیدخبردار کیا کہ سیلاب کے بعد پاکستان میں دوسری آفت کا خطرہ منڈلا رہا ہے جو مختلف وبائی امراض سے بیماریوں اور اموات کی صورت میں ہوگی۔

سماجی رابطے کی ویب سائٹ ٹوئٹر پر پیغام جاری کرتے ہوئے سربراہ عالمی صحت نے  کہا  کہ پاکستان میں سیلاب سے دو ہزار سے زائد صحت کے مراکز تباہ ہوگئے جس سے وبائی امراض سے نمٹنے کی صلاحیت کم ہوگئی ہے۔

سربراہ عالمی صحت کا کہنا تھا کہ پاکستان میں سیلاب کے بعد ایک اور ناگہانی آفت وبائی امراض کے پھوٹنے اور ان سے ہونے والے جانی نقصان کی صورت میں سر اُٹھا سکتی ہے۔

واضح رہے کہ سیلابی پانی تاحال کئی علاقوں میں کئی کئی فٹ موجود ہے جس سے ڈینگی، ملیریا، ٹائیفائیڈ اور جلد کی بیماریوں کا بڑے پیمانے پھیلاؤ کا خدشہ پیدا ہوگیا ہے۔